გრანტიორთა აქტივობები
http://rustaveli.org.ge/images/IMG_20181211_141835.jpg
12/12/2018 15:53

„მეგრულ–ლაზური ინტონაცია“

2018 წლის 11 დეკემბერს,  თსუ არნოლდ ჩიქობავას სახელობის ენათმეცნიერების ინსტიტუტის სხდომათა დარბაზში გაიმართა შოთა რუსთაველის ეროვნული სამეცნიერო ფონდის მიერ დაფინანსებული ფუნდამენტური საგრანტო პროექტის „მეგრულ–ლაზური ინტონაცია“ (217728) შუალედური წარდგინება. პროექტის წარდგინებაზე მოხსენებით გამოვიდნენ გრანტის სამეცნიერო ხელმძღვანელი - ფილოლოგიის დოქტორი ეთერ შენგელია (მეგრულ-ლაზური მასალის ექსპერიმენტული ანალიზის შედეგები) და პროექტის კოორდინატორი - დოქტორანტი ნათია ფონიავა (ლაზეთსა და სამეგრელოში ჩატარებული ექსპედიციების მიმოხილვა ). ღონისძიებას ესწრებოდა პროექტის კონსულტანტი საქართველოს მეცნიერებათა ეროვნული აკადემიის წევრ-კორესპონდენტი ვაჟა შენგელია, ასევე თსუ არნოლდ ჩიქობავას სახელობის ენათმეცნიერების ინსტიტუტის მეცნიერ თანამშრომლები.
სრულად
http://rustaveli.org.ge/images/12_1.jpg
10/12/2018 10:05

"სამცხე-ჯავახეთის რეგიონის რეტროსპექტული კარტოგრაფირება და სივრცითი ანალიზი "გურჯისტანის ვილაიეთის" საფუძველზე

2018 წლის 7 დეკემბერს ივანე ჯავახიშვილის სახელობის თბილისის სახელმწიფო უნივერსიტეტში შედგა შოთა რუსთაველის საქართველოს ეროვნული სამეცნიერო ფონდის მიერ დაფინანსებული პროექტის, YS-2016-44 - "სამცხე-ჯავახეთის რეგიონის რეტროსპექტული კარტოგრაფირება და სივრცითი ანალიზი "გურჯისტანის ვილაიეთის" საფუძველზე" პრეზენტაცია. პროექტის ხელმძღვანელმა რომან მაისურაძემ შეკრებილ საზოგადოებას წარუდგინა პროექტის დასკვნით ეტაპზე მიღებული შედეგები. პროექტი, რომელიც ორი წლის განმავლობაში გრძელდებოდა, სულ მალე (11.12.2018) სრულდება. კვლევა ეხებოდა XVI საუკუნის დროინდელი დოკუმენტის, "გურჯისტანის ვილიაიეთის დიდი დავთარის" მიხედვით რეტროსპექტული რუკების შექმნას, ასევე მის კომპლექსურ-გეოგრაფიულ ანალიზს. პროექტის ხელმძღვანელმა შეკრებილ საზოგადოებას გააცნო პროექტის განხორციელების ეტაპების და ჩატარებული სამუშაოების შესახებ. პროექტი ხორციელდებოდა ივანე ჯავახიშვილის სახელობის თბილისის სახელმწიფო უნივერსიტეტში. მისი მიმდინარეობის დროს მომზადდა სამცხე-ჯავახეთის რეგიონის თემატური გეოინფორმაციული სისტემები, რომელებიც რეგიონის XVI საუკუნის დროინდელიმდგომარეობას ასახავს. პროექტის ფარგლებში შეიქმნა რამდენიმე ათეული თემატური რუკა, რომელიც ასახავს "გურჯისტანის ვილიაიეთის დიდ დავთარში" შესულ ინფორმაციას და ფაქტობრივად, წყაროს კარტოგრაფიულ, სივრცისეულ რეპრეზენტაციას წარმოადგენს. თემატური რუკები შეეხება დასახლებების, მიწის ფონდისა და სოფლის მეურნეობის, მოსახლეობისა და მათზე დაკისრებული გადასახადების თემებს. პროექტის განმავლობაში მუშაობა მიმდინარეობდა სხვადასხვა თემებზე, რომელთა ნაწილი მომზადდა სამეცნიერო ნაშრომების სახით. მათგან ერთ-ერთ თემატიკაზე მომზადებული ნაშრომი წარდგენილი იყო საერთაშორისო სამეცნიერო კონფერენციაზე. ხოლო ნაშრომების გამოქვეყნება დაგეგმილია უახლოეს მომავალში. პროექტის ფარგლებში მომზადებულია მდიდარი და მრავალფეროვანი გრაფიკული შინაარსის მასალა, რომელიც სამომავლოდ შესაძლოა საფუძვლად დაედოს ფუნდამენტურ სამეცნიერო ნაშრომს, რომელიც კვლევის გაგრძელების შემდეგ შეიძლება მომზადდეს.
სრულად
http://rustaveli.org.ge/images/IMG_5558.JPG
10/12/2018 09:20

„Beauveria bassiana - "Bb007" - ის მასობრივი გამრავლების ტექნოლოგიის დამუშავება მავნე მწერების კონტროლისათვის საქართველოში“

ა/წ  7 დეკემბერს, 15.00 საათზე   საქართველოს  აგრარულ უნივერსიტეტში ჩატარდა  შოთა რუსთაველის საქართველოს ეროვნული სამეცნიერო ფონდის გამოყენებითი  კვლევების სახელმწიფო სამეცნიერო  გრანტების 2016 წლის კონკურსში გამარჯვებული პროექტი „Beauveria bassiana - "Bb007" - ის მასობრივი გამრავლების ტექნოლოგიის დამუშავება  მავნე მწერების კონტროლისათვის  საქართველოში“, შიფრი 216766,  დასრულებული პროექტის პრეზენტაცია.    ამჟამად, მთელ მსოფლიოში  განსაკუთრებული ყურადღება ექცევა უსაფრთხო, ბიოლოგიური საშუალებების გამოყენებას  მავნე მწერების ინტეგრირებული მართვის საქმეში (IPM). ბიოლოგიური კონტროლის აგენტებიდან  (BCA), ენტომოპათოგენური სოკოები (ეპს) წარმოადგენს  ერთ–ერთ ყველაზე ფართოდ გამოყენებად მიკროორგანიზმებს მცენარეთა დაცვის საქმეში,  რომელიც ადამიანის ჩარევის გარეშე, იწვევს მრავალი სახეობის  მავნე მწერის   რეგულარულ და დიდ  სიკვდილიანობას, არის ქიმიური პესტიციდების ალტერნატივა და  უსაფრთხოა ადამიანისა და გარემოსათვის. პრეზენტაციაში წარმოდგენილია პროდუქტი, ბიოლოგიური  პრეპარატი, რომელიც შექმნილია   ენტომოპათოგენური სოკოს Beauveria bassiana -ს ადგილობრივი შტამის საფუძველზე. პროექტის ფარგლებში, პირველად მოხდა შერჩეული აქტიური შტამის  Beauveria bassiana - Bb007  მასობრივი გამრავლება და მისი  ბიოფორმულაცია კომერციული მიზნებისათვის. განხორციელდა, წარმოებულ ბიოლოგიური  პრეპარატის  - მიკოპესტიციდის,  რეგისტრაცია საქართველოს გარემოს დაცვისა და სოფლის მეურნეობის სამინისტროს,  სურსათის ეროვნულ სააგენტოში,     სავაჭრო ნიშანით -   Bover-Ge ( ბოვერ–ჯი).  პრეპარატის წარმოება ხდებოდა კონსულტანტების  სტეფან იარონსკის (აშშ) და დიტრიხ შტეფანის (გერმანია) კონსულტაციის მეშვეობით. ახალი ბიოპესტიციდის შესახებ  მომზადდა საინფორმაციო ბუკლეტი, რომელიც მიაწვდის ინფორმაციას ფერმერებსა და  დაინტერესებულ პირებს. ასევე პროექტის ფარგლებში უცხოელ კოლეგებთან ერთად შეიქმნა „ მავნე ორგანიზმების ინტეგრირებული მართვის ტერ მინთა ინგლისურ-ქართული ლექსიკონი” - ავტორები: მედეა ბურჯანაძე, ქეთევან ქორიძე (საქართველოს აგრარული უნივერსიტეტი) სვეტლანა გულიი, ვლადიმერ გულიი (ვერმონტის უნივერსიტეტი,აშშ).  განმარტებითი ლექსიკონი არის პირველი წიგნი, მცენარეთა ინტეგრირებული დაცვის საქმეში, ქართულ ენაზე. პრეზენტაციას დაესწრო  პროფესორი ვლადიმერ გული, ვერმონტის უნივერსიტეტის პროფესორი, აშშ-დან,  რომელიც  ეწვია საქართველოს აგრარულ უნივერსიტეტს აღნიშნული წიგნის წარდგენისათვის. პროექტის სამეცნიერო ხელმძღვანელი მედეა ბურჯანაძე
სრულად
http://rustaveli.org.ge/images/20181205_141801.jpg
06/12/2018 10:32

„ფრანგები საქართველოში და ფრანგული ლიტერატურის რეფლექსია მე-17-20 საუკუნის დასაწყისის ქართულ კულტურულ სივრცეში“

2018 წლის 5 დეკემბერს თსუ შოთა რუსთაველის სახელობის ქართული ლიტერატურის ინსტიტუტში ჩატარდა წიგნის - „კავკასიის ფრანგული დღიური“ პრეზენტაცია.   წიგნი გამოიცა შოთა რუსთაველის საქართველოს ეროვნული სამეცნიერო ფონდის მიერ დაფინანსებული საგრანტო პროექტის - „ფრანგები საქართველოში და ფრანგული ლიტერატურის რეფლექსია მე-17-20 საუკუნის დასაწყისის ქართულ კულტურულ სივრცეში“ -ფარგლებში. ღონისძიება შესავალი სიტყვით გახსნა ინსტიტუტის დირექტორმა, პროფესორმა ირმა რატიანმა, რომელმაც ისაუბრა პროექტის მიზნებზე,  წიგნის ზოგად სტრუქტურაზე და აქტუალურ სიახლეებზე. წიგნი წარადგინეს პროექტის ძირითადმა შემსრულებლებმა და თარგმანის ავტორებმა: რუსუდან თურნავამ, ნინო გაგოშაშვილმა და ახალგაზრდა მეცნიერმა თათია ობოლაძემ. წარდგენილი იქნა წიგნის სამი სხვადასხვა ნაწილი: თეორიული საუძვლები, ფრანგი მხატვრებისა და მოგზაურების - ჟან პიერ მუანესა და ანრი ბლანშარის  სამოგზაურო ჩანაწერები და ქართველი არისტოკრატი ქალების ფრანგულენოვანი ეპისტოლური მემკვიდრეობა. პრეზენტაციაზე ასევე წარმოდგენილი იქნა საქართველოს ხელნაწერთა ეროვნულ ცენტრში დაცული, აქამდე შეუსწავლელი  ფრანგული  ხელნაწერი - „სამი ფრანგომასონური ტრაქტატი“, ვრცელი წინასიტყვაობით.  ითქვა, რომ  კვლევის  პროცესში,  პროექტის უცხოელი კონსულტატის, სორბონის უნივერსიტეტის პროფესორის, ალექსანდრ სტროევის თანამშრომლობით,  დადგენილი იქნა როგორც ძირითადი ნაშრომის, ისე წინასიტყვაობის ავტორები. აღინიშნა, რომ პროექტის დასასრულს, დაგეგმილია კიდევ ერთი წიგნის, ვრცელი  მონოგრაფიული გამოკვლევის გამოცემა, რომელსაც საფუძვლად დაედება   პირველ წიგნში შესულილიტერატურული მასალა. პრეზენტაციას ესწრებოდნენ შოთა რუსთაველის საქართველოს ეროვნული სამეცნიერო ფონდისა და ქართული საზოგადოების სხვა წარმომადგენელები.
სრულად
http://rustaveli.org.ge/images/grantiorta%20aqtivobebi/gfg.jpg
04/12/2018 11:19

„პროფესიული საჯარო მოხელის პროფესიული განვითარების საერთაშორისო გამოცდილება და ქართული მოდელის შექმნის პერსპექტივა“

28-30 ნოემბერს საქართველოს საპატრიარქოს წმიდა ანდრია პირველწოდებულის სახელობის ქართულ უნივერსიტეტში შოთა რუსთაველის  საქართველოს ეროვნული სამეცნიერო ფონდის მხარდაჭერით ჩატარდა საერთაშორისო სამეცნიერო კონფერენცია თემაზე - „პროფესიული საჯარო მოხელის პროფესიული განვითარების საერთაშორისო გამოცდილება და ქართული მოდელის შექმნის პერსპექტივა“, რომლის მუშაობაშიც მონაწილეობდნენ როგორც ქართველი, ისე უცხოელი ექსპერტები (5 ქვეყნის 11 წარმომადგენელი). პროექტი, რომლის ხელმძღვანელია ქართული უნივერსიტეტის პროფესორი პაატა ტურავა, გამარჯვებულია საერთაშორისო სამეცნიერო ღონისძიებების საგრანტო კონკურსში. საქართველოს საჯარო სამსახურის სისტემაში განსაკუთრებული ყურადღება ექცევა პროფესიული საჯარო მოხელის სტატუსს. საჯარო მოხელეების პროფესიული განვითარების სისტემა ჩვენს ქვეყანაში 2019 წლიდან უნდა დაინერგოს. ამისთვის უნდა შეიქმნას საჯარო სამსახურში მოხელეთა პროფესიული განვითარების ქართული მოდელი. კონფერენცია მიზნად ისახავდა საჯარო სამსახურის ქართული მოდელის მეცნიერული საფუძვლების გაანალიზებას და უცხოური გამოცდილების გაცნობას. პროფესიული საჯარო მოხელის სწავლების სისტემის დასანერგად საჭირო რეკომენდაციების შემუშავების თვალსაზრისით დიდი მნიშვნელობა აქვს საზღვარგარეთის საუკეთესო პრაქტიკის გათვალისწინებას, უცხოელი ექსპერტების მოსაზრებების გაცნობას. გარდა თემის სამართლებრივი ასპექტებისა, რომელთა განხილვას დაეთმო კონფერენცის მუშაობის პირველი დღე, სადაც ამ თემასთან დაკავშირებულ აქტუალურ საკითხებზე იმსჯელეს მომხსენებლებმა, პროფესორებმა პაატა ტურავამ, ნინო სარიშვილმა, ეკატერინე ქარდავამ, თემურ მაისურაძემ, მაია დვალიშვილმა, ვალერი მოდებაძემ და უცხოელმა ექსპერტებმა, მნიშვნელოვანი იყო რეფორმების განხორციელების ფინანსური უზრუნველყოფის მექანიზმები, რომელთა განხილვაში მეორე დღეს უკვე უცხოელ კოლეგასთან ერთად ქართველი ფინანსისტები და ეკონომისტები მონაწილეობდნენ: ლევან ქისტაური, მიხეილ ჯიბუტი,  ირაკლი მექვაბიშვილი, ნინო ჭოველიძე. ხოლო კონფერენციის მუშაობის მესამე დღე დაეთმო სტუდენტთა მიერ შესრულებული სამუშაოების პრეზენტაციას. სამეცნიერო კონფერენციაზე იმუშავა სამმა სტუდენტურმა სექციამ, რომელშიც გარდა ქართული უნივერსიტეტის სტუდენტებისა, მონაწილეობდნენ ივანე ჯავახიშვილის სახელობის თბილისის სახელმწიფო უნივერსიტეტის, ილიას სახელმწიფო უნივერსიტეტის და გრიგოლ რობაქიძის სახელობის უნივერსიტეტის სტუდენტები. სტუდენტებმა წარმოადგინეს მოხსენებები საჯარო მოხელეების პროფესიული მახასიათებლების, მოხელის სწავლებისა და საჯარო ფინანსური ხარჯების კონტროლის ინსტრუმენტების მიმართულებით. კონფერენციაზე წარმოდგენილი მოსაზრებების საფუძველზე შემუშავდა მოხელეთა პროფესიული განვითარების სისტემის ჩამოყალიბების მხარდამჭერი რეკომენდაციები.  
სრულად
http://rustaveli.org.ge/images/20181130_142214.jpg
03/12/2018 10:37

პანკრეატული ლიპაზას ახალი სპეციფიური ინჰიბიტორის შექმნა"

2018 წლის 30 ნოემბერს, კახა ბენდუქიძის კამპუსში  საქართველოს აგრარული უნივერსიტეტის  აუდიტორია #113 -ში,    გაიმართა შოთა რუსთაველის საქართველოს ეროვნული სამეცნიერო ფონდის ფუნდამენტური პროექტის: "პანკრეატული ლიპაზას ახალი სპეციფიური ინჰიბიტორის შექმნა" შედეგების შემაჯამებელი კონფერენცია.  მოხსენება გააკეთა პროექტის სამეცნიერო ხელმძღვანელმა, პროფესორმა ლევან გულუამ. კონფერენციას ესწრებოდნენ უნივერსიტეტის აკადემიური და სამეცნიერო პერსონალი. მომხსენებელმა აღნიშნა, რომ  პირველად დადგენილია ქართული ჩაის, ციტრუსებისა და ღვინოების ანტილიპაზური აქტივობები; შექმნილია ანტილიპაზური აქტივობის მქონე ბიოკომპოზიტი, რომლის გამოყენება შესაძლებელია ჭარბწონიანობის სამკურნალოდ. მიღებული შედეგები მოხსენებულია სამ საერთაშორისო კონფერენციაზე და გამოქვეყნებულია სამ უცხოურ რეფერირებად ჟურნალში.
სრულად
http://rustaveli.org.ge/images/IMG_7239.JPG
03/12/2018 09:22

„საქართველოს ნიადაგების წითელი წიგნის შექმნა და გამოცემა"

2018 წლის 30 ნოემბერს საქართველოს აგრარულ უნივერსიტეტის მუზეუმში გაიმართა შოთა რუსთაველის საქართველოს ეროვნული სამეცნიერო ფონდის მიერ დაფინანსებული გრანტის „გამოყენებითი კვლევებისათვის სახელმწიფო სამეცნიერო გრანტების კონკურსი“-ის გამარჯვებული პროექტის (ხელშეკრულება №AR 216726) „საქართველოს ნიადაგების წითელი წიგნის შექმნა და გამოცემა“ საბოლოო შედეგების საჯარო პრეზენტაცია. პროექტის სამეცნიიეროო ხელმძღვანელმა თამარ ქვრივიშვილმა და ძირითადმა შემსრულებელმა თენგიზ ურუშაძემ დამსწრე საზოგადოებას გააცნეს განხორციელებული კვლევები და მიღებული შედეგები. პროექტის ფარგლებში შეიქმნა საქართველოს ნიადაგების ორენოვანი (ქართულ-ინგლისური) წითელი წიგნი, სადაც განხილულია ნიადაგების მემორიალურ, იშვიათ და ეტალონურ ჯგუფებში გაერთიანების პრინციპები; მოცემულია ინფორმაცია ნიადაგწარმომქმნელი ფაქტორების, მორფოლოგიური ნიშნების, ძირითადი თვისებების მაჩვენებლებისა ნიადაგების წითელი ნუსხის შესახებ. ტექსტუალურ ნაწილს დართული აქვს ლანდშაფტებისა და ნიადაგების პროფილების ფერადი სურათები, ანალიზის მონაცემები წარმოდგენილია ცხრილებში. ნიადაგების წითელი წიგნის შექმნა ხელს უწყობს ნიადაგის, როგორც ერთ-ერთი ყველაზე ღირებული და ფაქტიურად, არაგანახლებადი რესურსის დაცვას. წიგნში წარმოდგენილი მასალების გამოყენება შესაძლებელია ნიადაგების დაცვის სამართლებრივი ბაზის სრულყოფის მიზნით. საქართველოს ნიადაგების წითელი წიგნი განკუთვნილია როგორც სპეციალისტებისთვის, აგრეთვე მკითხველთა ფართო წრისათვის, რომლებიც დაინტერესებულნი არიან საქართველოს ნიადაგების მნიშვნელობით, მათი დეგრადაციისა და დაცვის საკითხებით. საგრანტო პროექტის ფარგლებში მიღებული შედეგები მოხსენებულ იქნა საქართველოს მეცნიერებათა ეროვნულ აკადემიაში, ნიადაგმცოდნეობის რესპუბლიკურ კონფერენციებზე და ნიადაგმცოდნეობის 21-ე მსოფლიო კონგრესზე ბრაზილიაში სადაც წარდგენილი იქნა პოსტერი. პროექტის ფარგლებში შეიქმნა და გამოქვეყნდა ორი სამეცნიერო სტატია რეცენზირებად ჟურნალში.
სრულად
http://rustaveli.org.ge/images/20181130_160845.jpg
30/11/2018 10:36

,,საქართველოში ინოვაციური მეთოდების შემუშავება ორგანულ მევენახეობაში“

2018 წლის 30 ნოემბერს, სოფლის მეურნეობის სამეცნიერო -კვლევითი ცენტრის საკონფერენციო დარბაზში, ჩატარდა სსიპ შოთა რუსთაველის საქართველოს ეროვნული სამეცნიერო ფონდის მიერ  გამოყენებითი კვლევებისათვის სახელმწიფო სამეცნიერო გრანტის 2016 წლის საგრანტო კონკურსში გამარჯვებული პროექტის ,,საქართველოში ინოვაციური მეთოდების შემუშავება ორგანულ მევენახეობაში“ შედეგების პრეზენტაცია. პროექტის ხელმძღვანელი გახლავთ მაია მირველაშვილი. პროექტის ფარგლებში განხორციელებული კვლევების საფუძველზე (აღმოსავლეთ და დასავლეთ საქართველოს ვერტიკალურ ზონებში ვაზის, ნიადაგის, კლიმატისა და აგროტექნიკის უთიერთქმედების შესწავლა). საქართველოში პირველად მეცნიერულად დამუშავდა ბიოყურძნის წარმოების სქემა, რომელიც მაქსიმალურად მორგებულია ადგილობრივ პირობებსა და ჯიშებს; შეიქმნა მოდელი  ბიომევენახეობის მდგრადი განვითარების და ერთ-ერთი ეროვნული პრიორიტეტის - ვაზის ბიომრავალფეროვნების დაცვისთვის. ორგანული მევენახეობის განვითარების ერთერთი უმნიშვნელოვანესი შედეგია ბიომეურნეობებში და მიმდებარე ტერიტორიებზე ბუნებრივი წონასწორობის აღდგენა. საცდელ ვენახებში ჩატარებული ექსპერიმენტული ბიოღონისძიებების საფუძველზე  (ჩვენს მიერ ორგანული ქიმიის ინსტიტუტთან ერთად შექმნილმა პრეპარატმა ,,ბენტონიტმა’’ დიდი გამოხმაურება ჰპოვა სამეცნიერო წრეებში, რომლის გამოყენებაც საშუალებას იძლევა შემცირდეს გოგირდის გამოყენების ჯერადობა და რაოდენობა), გამრავლდა ენტომოფაგები და სასარგებლო მწერები, მოხდა ნიადაგის მიკროფლორის აღდგენა და გამდიდრება, რამაც გააძლიერა ვაზის გამძლეობა და შედეგად გაუმჯობესდა ყურძნის ხარისხი, გემოვნური მაჩვენებლები, გაიზარდა პროდუქციის შენახვის ხანგრძლივობა.   მიღებულ შედეგებზე დაყრდნობით ფერმერებისათვის შეიქმნა სადემონსტრაციო ნაკვეთი, გამოიცა და გავრცელდა სამი სარეკომენდაციო  ბროშურა, დაიბეჭდა ორი მონოგრაფია მათ შორის ,,ბიომევენახეობა,’’ რეფერირებულ ჯურნალებში გადაცემულია 7 სტატია, ჩატარდა სამუშაო შეხვედრები და სემინარები,  მონაწილეობა მივიღეთ ტელე-რადიო გადაცემებში, რითაც მაქსიმალური პოპულარიზაცია გავუწიეთ ორგანული მევენახეობის განვითარებას საქართველოში.
სრულად
http://rustaveli.org.ge/images/20181126_150818.jpg
27/11/2018 10:51

”მეწყრების მონიტორინგის და ადრეული შეტყობინების ეკონომიური ტელემეტრული სისტემის შექმნა“ .

2018 წლის 26 ნოემბერს, ორშაბათს,  15 საათზე ივანე  ჯავახიშვილის სახელობის  თბილისის სახელმწიფო უნივერსიტეტში მიხეილ ნოდიას სახელობის გეოფიზიკის ინსტიტუტის სამეცნიერო ჯგუფმა წარმოადგენს  შოთა რუსთაველის  - ეროვნული სამეცნიერო ფონდის მიერ დაფინანსებული დასრულებული პროექტი (#216732) -  ”მეწყრების მონიტორინგის და ადრეული შეტყობინების ეკონომიური ტელემეტრული სისტემის შექმნა“ . საქართველოს ტერიტორია ფართომასშტაბიანი გეოლოგიური პროცესების (მეწყრების და ღვარცოფების კერების რაოდენობა ჩვენთან 40 000 რიგისაა), მოსახლეობის ზრდის, ინტენსიური მიწათსარგებლობისა და მსხვილი საინჟინრო ნაგებობების დიდი რაოდენობის გამო, ეკუთვნის ურთულეს, მოწყვლად მაღალმთიან რეგიონებს მსოფლიოში. წარმოდგენილი ღვარცოფების/მეწყრების ადრეული შეტყობინების  სისტემის (აშს) პროექტი მიზნად ისახავს ეკონომიური და სანდო გეოფიზიკური მონიტორინგის ტელემეტრული კომპლექსის შექმნას ავტონომური კვებით (მზის ბატარეებით), რომელიც გვამცნობს კატასტროფული მოვლენის მოახლოებას და დაწყებას რადიოსიგნალების ან ინტერნეტის საშუალებით. ამ თითქოს და შეუთავსებელი მოთხოვნების - ეკონომიურობისა და სიზუსტის - დაკმაყოფილება შესაძლო გახდა ბოლო წლებში თანამედროვე მაღალი ტექნოლოგიების წყალობით. შეიძლება ითქვას, რომ ჩვენი მოწყობილობა არის დიაგნოსტიკური სისტემა, რომელიც მუდმივად იღებს ინფორმაციას, ადარებს მათ შეთანხმებულ კრიტერიუმებს (ნიადაგის ტენიანობის და დიფერენციალური აჩქარების კრიტიკულ მნიშვნელობებს) და იღებს გადაწყვეტილებას განგაშის ტელემეტრული სიგნალის გაგზავნაზე. დამუშავებულია ღვარცოფის/მეწყრის ინიცირების ალბათობის გაზრდის კრიტერიუმები სხვადასხვა დონეზე ავარიული სიგნალების გადმოსაცემად (სიწყნარე, ყურადღება, საშიშროება), ნიადაგის ტენიანობის, დახრების და დიფერენციალური აჩქარებების მონაცემების გამოყენებით. აწყობილია და გლდანის მეწყერზე ტესტირებულია დიფერენციალური აჩქარების, დახრების და ნიადაგის ტენიანობის გაზომვებზე დაფუძნებული საველე პირობებში მომუშავე ადრეული შეტყობინების სისტემის ქსელური პროტოტიპის მოდული. ადრეული შეტყობინების სისტემის საველე სადგურის შემადგენელი ელემენტების ღირებულება შეადგენს  1300 $, რაც მნიშვნელოვნად უფრო იაფია, ვიდრე ბაზარზე არსებული დანადგარები. აღნიშნულ სისტემასთან დაკავშირებით მიღებულია ჩვენი განაცხადი პატენტზე.  
სრულად
http://rustaveli.org.ge/images/mtavarze.jpg
26/11/2018 10:50

„დამბალხაჭოს მიკრობიომის შესწავლა და მისი წარმოება“

25  ნოემბერს, დასრულა შოთა რუსთაველის საქართველოს ეროვნულ სამეცნიერო ფონდის გამოყენებითი კვლევებისათვის სახელმწიფო სამეცნიერო გრანტების ფარგლებში დაფინანსებული  პროექტის „დამბალხაჭოს მიკრობიომის შესწავლა და მისი წარმოება“.  პროექტის პრეზენტაცია შედგა ლისის ტბაზე „ლისი ლაუნჯის“ ტერიტორიაზე, სადაც პროექტის ხელმძღვანელმა თ. ჯაფარიძემ დამსწრეებს გააცნო განხორციელებულ კვლევა და მიღებული შედეგები. პროექტის შედეგად შესწავლილია და დახასიათებულია „დამბალხაჭოში“ შემავალი მიკროორგანიზმები, როგორც მორფოლოგიურად, ასევე გენომურ დონეზე განახორციელა NGS სეკვენირება და მიკროორგანიზმების OUT იდენტიფიკაცია, რამაც საშუალება მოგვცა   პროდუქტში შემავალი სოკოების და ბაქტერიების  რაოდენობირივი შესწავლის. აღმოჩნდა, რომ პროდუქტი ძირითად მაფერმენტირებელ მიკროფლორას წარმოადგენს, Geotrichum Candidum და Penicillium Camemberti სოკოვან შტამები. ხაჭოში შემავალი ძირითადი ბაქტერიებია: L.Lactis, S. Thermophile, გარდა ამისა აღმოჩენილია და დახასიათებულია ბიფიდობაცტერიული შტამები B. Breve, B. Longum  და სხვა. პროექტის ფარგლებში დამუშავებულია როგორც დამბალხაჭოს მაფერმენტირებელი სოკოვანი კულტურების,  ასევე ბაქტერიული კულტურების სუბლიმაციური შრობის ტექნოლოგია. შემუშავებულია პროდუქტის მაფერმენტირებელი მიკროორგანიზმების სხვადასხვა ფორმულაციები  და შესწავლილია საწარმოო პარამეტრები, ტემპერატურა, ტენი, ფერმენტაციის ოპტიმალური დრო და სხვა. ყოველივე,  საშუალებას გვაძლევს  შევინარჩუნოთ ამ უნიკალური პროდუქტის სპეციფიური მახასიათებლები და ამასთან ერთად მწარმოებლებს შევთავაზოთ სტადარტიზებული მიკროფლორა და საწარმოო რეგლამენტი.
სრულად