კონკურსის ,,ლეონარდო და ვინჩის’’ გამარჯვებულები შემეცნებითი ტურის ფარგლებში CERN-ში იმყოფებიან
საქართველოს განათლებისა და მეცნიერების სამინისტროს სსიპ შოთა რუსთაველის საქართველოს ეროვნული სამეცნიერო ფონდის მოსწავლე გამომგონებელთა და მკვლევართა კონკურსის ,,ლეონარდო და ვინჩის’’ გამარჯვებულები შემეცნებითი ტურის ფარგლებში ბირთვული კვლევების ევროპულ ორგანიზაციაში (CERN) იმყოფებიან.
აღსანიშნავია, რომ ახალგაზრდა გამომგონებლებმა CERN-ში წარადგინეს პრეზენტაციები თავიანთი გამოგონებებისა და ინოვაციური პროექტების შესახებ, რამაც დამსწრე საზოგადოების დიდი ინტერესი გამოიწვია.
ნორჩ გამომგონებელთა კონკურსი „ლეონარდო და ვინჩი“ რუსთაველის ფონდის პოპულარული კონკურსია, რომელიც ყოველწლიურად ტარდება. კონკურსის მიზანია მეცნიერების პოპულარიზაცია მოსწავლე ახალგაზრდებს შორის, მათში ინოვაციებისა და ტექნიკის მიმართ ინტერესის გაღვივება. კონკურსი ღია კონკურენციის პრინციპით ავლენს და ახალისებს გამომგონებლის ნიჭით დაჯილდოებულ მოზარდებს, სტიმულს აძლევს მათი შემოქმედებითი აზროვნების, კვლევითი და პრაქტიკული უნარ-ჩვევების განვითარებას. კონკურსში მონაწილეობენ საჯარო და კერძო სკოლების VII-XII კლასების მოსწავლეები.