20 ივლისს, შოთა რუსთაველის საქართველოს ეროვნული სამეცნიერო ფონდის გენერალური დირექტორი ჯაბა სამუშია, ფონდის წარმომადგენლები საქართველოში საბერძნეთის ელჩს, დიმიტრიოსს კარაბალისს შეხვდნენ. შეხვედრის მონაწილეებმა გაცვალეს ინფორმაცია სამეცნიერო ფონდების საქმიანობისა და პრიორიტეტების შესახებ.

საბერძნეთის ელჩმა უახლოეს მომავალში რუსთაველის ფონდსა და საბერძნეთის სამეცნიერო ფონდს შორის ურთიერთობის დამყარებაში მხარდაჭერის მზაობა გამოთქვა, რაც ურთიერთგაგების მემორანდუმის გაფორმებას ითვალისწინებს.

ფონდის გენერალურმა დირექტორმა ხაზი გაუსვა საბერძნეთის მხარესთან ბილატერალური პროგრამის შემუშავების საკითხს, რაც შესაძლოა მოიცავდეს როგორც STEM, ასევე ჰუმანიტარული მეცნიერებების მიმართულების კვლევების მხარდაჭერას. შეხვედრაზე ასევე ისაუბრეს სამეცნიერო წყაროების შენარჩუნების მიზნით, კონსერვაცია/რესტავრაციის მიმართულებით ურთიერთთანამშრომლობის განვითარებაზე.

მხარეებმა ასევე გამოთქვეს სურვილი ტექნოლოგიური კვლევების მიმართულებით თანამშრომლობის დაწყებასა და განვითარებაზე. შეხვედრაზე ისაუბრეს საქართველო-საბერძნეთის ისტორიულ-კულტურულ კავშირებზე, სამეცნიერო მიმართულებით ურთიერთობების გაფართოების მნიშვნელობაზე.