შემაჯამებელი პრეზენტაცია პროექტის „ქვემო ქართლის ეკოსისტემების მძიმე ლითონებით დაბინძურების ინტეგრირებული კვლევა” ფარგლებში
16 დეკემბერს გაიმართა შოთა რუსთაველის ეროვნული სამეცნიერო ფონდის ახალგაზრდა მეცნიერთა კვლევითი საგრანტო პროექტის ‘’ქვემო ქართლის ეკოსისტემების მძიმე ლითონებით დაბინძურების ინტეგრირებული კვლევა და გავლენა სასურსათო პროდუქტების უვნებლობაზე’’ საბოლოო ანგარიშის ონლაინ პრეზენტაცია. პროექტის ხელმძღვანელი - გეოლოგიის მეცნიერებათა დოქტორი ელინა ბაქრაძე.
პროექტში კომპლექსურად არის შესწავლილი ბუნებრივი წყლების შემადგენლობა ორგანოლეპტიკური, ქიმიური და ბიოლოგიური მახასიათებლების მიხედვით. მასში გამახვილებულია ყურადღება გარემოს დაბინძურებაზე იმ მძიმე ლითონებით, რომელიც პრიორიტეტულია ამ რეგიონისათვის.
პროექტის შედეგები მნიშვნელოვანია, ვინაიდან საქართველო მცირემიწიანი ქვეყანაა და თითოეული ჰექტარი სასოფლო-სამეურნეო სავარგულის დაბინძურებისაგან დაცვა მეტად აქტუალური და საჭიროა. ამ პროექტის განხორციელებით რეგიონის თვითმმართველობის ორგანოებს და ფერმერებს საშუალება ეძლევათ, ეკოსისტემების დაბინძურების შემთხვევაში, გაატარონ ქმედითი ღონისძიებები მათი ლიკვიდაციისათვის, ამიტომ მიღებული შედეგები არის მეტად საჭირო და გამოყენებადი. ამით მათ მიეცემათ საშუალება აწარმოონ სუფთა პროდუქტი, რაც მეტად მნიშვნელოვანია ეკოლოგიური თვალსაზრისით. პროექტის შედეგს აქვს როგორც სამეცნიერო ღირებულება, ისე პრაქტიკული გამოყენება. ის კონკურენტუნარიანია, რადგან ანალოგიური შედეგები არ არის მიღებული. პროექტის ინოვაციური შედეგია ეკოსისტემებში და სასურსათო პროდუქტებში მძიმე ლითონების შემცველობის მონაცემთა განახლებული ბაზა, აგრეთვე ბოლო 5 წლის სტატისტიკური მასალები. პროექტის ფარგლებში შექმნილი მონაცემთა ბაზა ხელმისაწვდომი იქნება ყველა დაინტერესებული პოტენციური მომხმარებლისათვის; კვლევაში მიღებულ შედეგებზე დაყრდნობით მომზადდა შემარბილებელი ღონისძიებები და რეკომენდაციები რეგიონის თვითმმართველობის ორგანოებისა და ფერმერებისათვის.