საქართველო VIII საუკუნეში პოლიტიკური ისტორია
წიგნი თავისი შინაარსის გათვალისწინებით საინტერესო იქნება ქართველოლოგებისთვის, კავკასიოლოგებისთვის, აღმოსავლეთმცოდნეებისთვის, ბიზანტინოლოგებისთვის, ხაზარული კვლევებითა და, ზოგადად, შუა საუკუნეების ისტორიით დაინტერესებული მკვლევართა და მკითხველთა ფართო აუდიტორიისთვის.
„საქართველო VIII საუკუნეში: პოლიტიკური ისტორია“ არის საქართველოს ისტორიის შესახებ დაწერილი სამეცნიერო გამოკვლევა, რომელშიც, უკვე ცნობილ და, ასევე, ამ საკითხთან მიმართებაში ახალ მასალაზე დაყრდნობით, განხილულია მერვე ასწლეულის საქართველოში მიმდინარე პოლიტიკური პროცესები.
ნაშრომში მოცემულია VIII საუკუნის საქართველოს ისტორიის შესახებ არსებული ისტორიული წყაროების ვრცელი მიმოხილვა. მასში, ასევე გადმოცემულია ამავე საუკუნის საქართველოს ისტორიაზე დაწერილი აკადემიური ლიტერატურის განხილვა და შეფასება. სპეციალურ ლიტერატურაში საქართველოს მერვე საუკუნის პოლიტიკური ისტორია არაბობის ხანად განიხილებოდა, რაც, ისტორიული მასალების ანალიზის შედეგად, ამ მონოგრაფიაში უარყოფილია.
წიგნში განსაკუთრებული ყურადღება ეთმობა ჯუანშერის, მერვე საუკუნის ქართველი ისტორიკოსის, ცნობებს. ისინი ადრე ნაკლებ ნდობას იმსახურებდა. ამ ცნობების მიხედვით, უკვე მერვე საუკუნეში დასტურდება ერთიანი საქართველოს სამეფოს არსებობა, რომელიც მოიცავდა ქართლს, ეგრისსა და აფხაზეთს. წიგნში ამ სამეფოს არსებობა გამყარებულია სხვა ისტორიული მასალის მოშველიებით, ხოლო ჯუანშერი სანდო მემატიანედ არის მიჩნეული.
მონოგრაფიაში მოთხრობილია VIII საუკუნის საქართველოს პოლიტიკური ისტორია, რომელიც იმ პერიოდის საერთაშორისო ურთიერთობების ფონზეა გადმოცემული. საერთაშორისო ვითარება, რომელიც დიდ გავლენას ახდენდა საქართველოზე, სათანადოდ არის მიმოხილული. წიგნს ახლავს ვრცელი ბიბლიოგრაფია, სამი დამატება და ინგლისური რეზიუმე. მონოგრაფიის ძირითადი თემა საქართველოს მერვე საუკუნის ისტორიაა, მაგრამ ამავე საუკუნეში განვითარებული პროცესები საერთაშორისო ურთიერთობათა კონტექსტში არის გააზრებული.
წიგნის სრული ელექტრონული ვერსია შეგიძლიათ იხილოთ:
